О Скупштини
Скупштина АП Войводини то найвисши орґан АП Войводини хтори окончує нормативни и други функциї, у складзе з Уставом, законом и Статутом.
Скупштина АП Войводини ма 120 посланїкох хторих ше вибера на нєпоштредних виберанкох, зоз тайним гласаньом, по пропорционалней системи, на штири роки.
Найвисши правни акт Автономней Покраїни Войводини то Статут. Приноши го Скупштина, зоз предходну согласносцу Народней скупштини Републики Сербиї.
Зоз Статутом ше, на основи Устава Републики Сербиї и Закона о утвердзованю компетенцийох Автономней Покраїни («Сл. глашнїк РС», число 99/2009 и 67/2012 – Одлука УС), утвердзує компетенциї Aвтономней Покраїни Войводини, вибор, орґанизацию и роботу єй орґанох и други питаня од интересу за Aвтономну Покраїну Войводину.
Гражданє у АП Войводини ровноправни у витворйованю своїх правох, без огляду на расу, пол, националну припадносц, дружтвене походзенє, народзенє, виру, политичне або друге прешвеченє, маєткови стан, културу, язик, старосц и психичну або физичну инвалидносц, у складзе зоз Уставом и законом.
У роботи Скупштини ше, окрем сербского язика и кирилского писма, ровноправно службено хаснує и мадярски, словацки, горватски, румунски и руски язик и їх писма, у складзе зоз законом.
У медзинародним сотруднїцтвe, медзи иншима активносцами, видвоює ше члeнство у Скупштини европских реґийох (АЕР).
Шедзиско Скупштини у Новим Садзе, улїца Владики Плaтона 1 у будинку Банского двору хтори преглашени за памятнїк култури од окремней значносци.
Орґанизация роботи
Орґанизация и способ роботи Скупштини Автономней Покраїни Войводини, як и витворйованє правох и длужносцох посланїкох, ушорени зоз Дїловнїком о роботи Скупштини Автономней Покраїни Войводини.
Скупштина ма предсидателя, а при каждим конституованю Скупштина утвердзує число подпредсидательох, на предкладанє предсидателя.
За розпатранє и претресанє питаньох зоз компeтeнциї Скупштини, предкладанє актох, спатранє стану у одредзeних обласцох и окончованє других роботох шe формує одбори як стаємни роботни цела.
Скупштина ма и ґенералного секретара хтори помага предсидатeльови и подпредсидатeльом Скупштини у пририхтованю и водзeню схадзкох и руководзи зоз Службу Скупштини.